“Nas súas manifestación exhiben bandeiras de grupos políticos e non contan co apoio dos veciños” asegura a deputada Marisol Piñeiro Martínez.
O debate parlamentario do día despois de Nadal serviu para que a deputada popular carnotán Marisol Piñeiro atacara verbalmente a asociación Monte Pindo Parque Natural, coa que mantén unha vella discrepancia e un enfrontamento mutuo.
Para Marisol Piñeiro, a asociación Monte Pindo Parque natural é unha entidade “totalmente politizada xa que nas súas manifestacións exhiben as bandeiras de grupos políticos e non conta co apoio dos veciño de O Pindo, que os chegaron a apupar no único acto que fixeron neste lugar”.
Piñeiro Martínez afirma que este colectivo está composto “practicamente na súa totalidade” por xente que non é do Pindo e que aínda que actúan de boa fe non coñecen “a verdadeira realidade do Pindo”. Pensa que na asociación “o único fin real que perseguen é o acoso e derribo do Partido Popular e do Goberno da Xunta de Galicia”.
A parlamentaria do PPdeG volveu a referirse sobre as peticións de distintos colectivos e partidos políticos para que o Monte Pindo conte coa declaración de Parque Natural: “O Monte Pindo xa conta coa máxima protección medio ambiental e non existe ningunha disposición legal que outorgue máis garantías de conservación aos espazos declarados parques naturais fronte aos que forman parte da Rede Natura, como neste caso o monte Pindo”.
Marisol Piñeiro manifestou que “os veciños de O Pindo non están pola labor de declarar este monte como parque natural” e salientou o traballo de conservación realizado pola Xunta de Galicia “sempre seguindo criterios técnicos e actuando con responsabilidade e sabendo o que se fai para a recuperación deste espazo”.
FOTO-PPdeG- Marisol Piñeiro primeira pola esquerda
