Xoán Bascuas resposta a Feijóo:“Somos un partido galego, unido e estamos limpos e libres de corrupción. A que Feijóo non pode dicir o mesmo do seu?”
O secretario xeral de Compromiso por Galicia e candidato á presidencia, Xoán Bascuas, rexeitou as recentes declaracións do candidato do PP, Alberto Núñez Feijóo, nas que o dirixente político conservador defendía a opción dos populares fronte a división existente nos seus rivais.
“Feijóo dí que o seu partido é o único unido e o único unido a Galicia. A parte de que evidentemente é falso, o que non pode engadir a esa afirmación é que é tamén un partido limpo e libre de corrupción. Pois ben, Compromiso si pode certificar que somos un partido unido, que nós sí que estamos unidos a Galicia e que somos un partido limpo e libre de corrupción” manifestou Bascuas no transcurso dunha visita a cidade de Lugo.
O candidato galeguista pensa que Feijóo pretende que non se fale de Compromiso por Galicia porque representa a alternativa real ao Partido Popular, aínda que asegurou que a mensaxe de Compromiso estaba acadando boa receptividade en Galicia:Está claro que o rival incómodo do PP é Compromiso por Galicia. Claro que hai unha alternativa socialdemócrata, progresista e galeguista. Feijóo sábeo e por iso non lle interesa que se escoite unha mensaxe que está sendo moi ben acollida nas rúas e que se traducirá en votos o 25S”.
Bascuas estivo acompañado nun reparto de publicidade na cidade da muralla polo candidato pola provincia, Juan Carlos Piñeiro Docampo, a número dous Melina Paz e polo secretario nacional de organización, Manoel Vello Salvado.
