A deputada de En Marea insiste en que “un dos axentes actuou de maneira desproporcionada” e fala de “acusacións falsas”.
Publicamos a explicación (texto completo) que ofreceu a deputada Paula Quinteiro sobre a polémica suscitada no día de onte.
A versión de Paula Quinteiro
Co obxecto de responder ás acusacións infundadas que se están vertendo dende diferentes medios de comunicación, gustaríame aclarar o que sucedeu e, sobre todo, o que non sucedeu a noite do 17 de marzo:
Un grupo de persoas estabamos camiñando pola Praza de Galicia con absoluta normalidade e sen xerar ningún problema para a veciñanza. Nese momento unha das persoas que estaban comigo foi interceptada pola Policía, chegando varios vehículos, esixíronlle que se identificara e cando este lle preguntou os motivos polos que procedían a súa identificación, un dos axentes actuou de maneira desproporcionada.
Debido ao conflito absolutamente innecesario que se estaba a dar, procurei mediar para evitar calquera incidente e evitar problemas. Nunca tratei de impedir a identificación de ninguén, de feito, eu mesma me identifiquei a pesar de non ter sido requerido e a policía identificou a todas aquelas persoas que considerou necesario.
En ningún momento utilicei a miña condición de deputada para amedrentar aos axentes. Esa é outra das mentiras que se estiveron a difundir durante o día de hoxe, e que tamén quero desmentir con esta publicación.
Non lle din maior importancia a este incidente xa que ningunha persoa quedou retida e continúamos camiñando con normalidade. Sorprende que diante do relato que se está a elaborar non se produciran detencións vinculadas a eses actos de suposto vandalismo, dos que por suposto non participamos.
Resulta curioso que o atestado estea xa nas redaccións dalgún xornal cando eu mesma non teño acceso a el. Xa se está a crear un relato interesado que favorece á estratexia do Partido Popular e está destinada a desgastar o espazo político do cambio.
Quero agradecer todos os apoios recibidos.