Foro organizado por Código Cero en Santiago de Compostela.
CESGA- Imaxe Wikipedia
En febreiro de 1993 o Centro de Supercomputación de Galicia(CESGA) conectábase por primeira vez coa rede de redes.Vintecinco anos despois, a revista tecnolóxica galega Código Cero, en colaboración co colexio profesional de enxeñeiros en informática de Galicia, promove un foro para falar e reflexionar sobre todo o camiño percorrido desde entón. E tamén para celebrar a chegada da internet a Galicia.
Será o vindeiro luns a partir das 19,30h no auditorio 2 do Centro de Innovación cultural (Edif. Cinc) da Cidade da Cultura, en Santiago de Compostela.
Prestixiosos convidados no foro de Código Cero
Intervirán Juan Casares Long, Catedrático da Universidade de Santiago e director do CESGA en 1993, Juan Luis Ruiz Buján, responsable de comunicación do CESGA en 1993,Henrique Neira, autor de “Historia da informática.Unha cronoloxía”,José Ignacio López Cabido, subdirector técnico do CESGA e Carlos Pajares, profesor emérito de Física Técnica da USC.
A entrada a este foro tecnolóxico é gratuíta e no mesmo repartiranse exemplares do libro de Henrique Neira. Código Cero é unha revista de ciencia, innovación e tecnoloxía que leva uns 16 anos de historia. Tamén conta cunha edición dixital que xunto coas información habituais publica cada mes o Top-100 dos webs máis visitados, segundo as medicións de Alexa, e no que figuran os diarios Adiante Galicia e tamén Anosacosta.
