Unha moza resultou ferida esta tarde en Outes ao sufrir unha saída de vía. O seu vehículo caeu por un desnivel e acabou esnafrándose contra un poste. O accidente rexistrouse na estrada que une a localidade con Pino do Val ao seu paso polo lugar de Rodeiro, na parroquia de Matasueiro.
A vítima tivo que ser liberada polos efectivos mobilizados, axudados dun equipo de excarceración. Ata o lugar tamén se mobilizou o helicóptero con base en Santiago, que tivo que cancelar o seu servizo por mor das malas condicións meteorolóxicas.
Unha persoa particular alertaba do sinistro ao 112 Galicia ás 16:40 horas desta tarde. O persoal do Centro de Atención ás Emerxencias informou a Urxencias Médicas, aos Bombeiros de Boiro e ao GES de Muros. Os feitos tamén foron postos en coñecemento de Protección Civil e da Garda Civil de Tráfico.
Caída de tractor
Tamén en Outes, un home resultou ferido esta tarde ao caer do tractor co que circulaba por unha pista forestal. O contratempo tivo lugar en Cuns, na parroquia de Cando.
O 112 Galicia recibía o aviso de Urxencias Médicas minutos despois das 18:00 horas desta tarde. Os efectivos do CAE 112 alertaron aos Bombeiros de Boiro e ao GES de Muros. Tamén se informou a Protección Civil, á Policía Local e á Garda Civil de Tráfico. A esta hora, os efectivos mobilizados continúan no punto.
