Por segundo ano consecutivo o concello de Mazaricos quere celebrar o día mundial do leite: «É o segundo ano que celebramos coa veciñanza que se achega ao concello este día porque así lembramos a importancia económica e tamén social deste produto, e non só para o noso municipio, para toda Galicia» comenta o rexedor Juan Blanco.
Por este motivo, a vaca Mazarica estará na casa do concello e haberá un convite de produtos lácteos para os que se cheguen ata o edificio municipal, que ademais recibirá a visita dos nenos da Escola Infantil.
«Igual que noutras actividades, tratamos de achegar aos máis pequenos ao que somos, á esencia de Mazaricos e Mazaricos non sería tal sen o sector agrogandeiro», afirmou o alcalde, Juan José Blanco Riveiro. Desde o concello tamén queren dar visibilidade a esta xornada e ao sector a través das redes sociais.
