A Garda Civil detivo cinco persoas como presuntas autoras de dous roubos con forza e da subtracción dun vehículo a motor no marco da Operación Lukus. A investigación iniciouse tras a denuncia dun roubo nunha nave municipal situada no polígono industrial de Negreira.
Segundo informou a Garda Civil, os autores levaron ferramenta especializada, un remolque e un vehículo tipo pick-up. As cámaras de seguridade permitiron identificar a actuación coordinada de cinco persoas. Poucos días despois, os axentes localizaron o remolque abandonado en Rábade e recuperaron tamén o vehículo roubado.
As pescudas revelaron que o automóbil foi empregado posteriormente nun segundo roubo nun concesionario da cidade de Lugo, onde foi fracturada a entrada para subtraer unha máquina de cobro con máis de mil cento sesenta euros en efectivo.
O valor total do material subtraído supera os sesenta mil euros, aos que hai que engadir os danos ocasionados. Os detidos e as dilixencias foron postos a disposición xudicial en Negreira.
