O Concello de Val do Dubra formalizou a ocupación e o pagamento dos terreos necesarios para o futuro polígono industrial de Bembibre, cun investimento total de 512.085,02 euros, tras acadar un acordo maioritario cos propietarios afectados.
O proceso, que inclúe 15 parcelas, culmina así un trámite clave dentro da expropiación urbanística, permitindo avanzar nun proxecto destinado á creación de solo industrial no municipio.
Segundo o goberno local, esta actuación desbloquea unha iniciativa iniciada no ano 2005, orientada a dotar a Val do Dubra do seu primeiro solo industrial planificado. O ámbito sitúase fronte á antiga fábrica da Telleira e contará con conexión prevista cara Faxón.
O alcalde, Diego Luis Méndez, sinalou que “supón unha grande satisfacción ver culminado un procedemento que se desenvolveu ao longo de máis de vinte anos”, destacando o traballo realizado para acadar acordos cos propietarios. Valoración positiva que comparte o primeiro tenente de alcalde Antonio Negreira (Anova).
O proxecto contou con diferentes fases administrativas, entre elas a modificación urbanística aprobada en 2005, o plan de sectorización validado en 2010 e a aprobación inicial do expediente de expropiación en 2022, que foi aprobado definitivamente en decembro de 2025.
Unha vez completado este proceso, o Concello prevé avanzar na definición da fórmula de desenvolvemento do polígono, avaliando distintas opcións para a súa posta en marcha.
O executivo local sinala que esta actuación ten como obxectivo facilitar a implantación de empresas e atender a demanda de solo empresarial na contorna.
