O portavoz municipal do Partido Popular de Val do Dubra, José Manuel Varela Ferreiro, asegurou hoxe que a rotonda de acceso ao futuro polígono industrial do municipio “non é unha actuación nova”, e lembrou que xa conta con proxecto técnico, terreos dispoñibles e un compromiso previo da Deputación da Coruña.
Varela explicou que o proxecto foi redactado e presentado polo goberno do PP atendendo ás indicacións da propia Deputación, e que o deseño xa contemplaba o acceso ao polígono e tamén aos terreos industriais anexos.
Varela: «Agora só falta cumprir»
O portavoz popular destacou que a compra da antiga fábrica, realizada no seu momento polo PP, permite executar a rotonda sen necesidade de novas expropiacións, e sinalou que esa operación fora cuestionada polo PSOE.
“O proxecto está feito, os terreos están dispoñibles e existe un compromiso adquirido. Agora só falta cumprir”, afirmou José Manuel Varela que pediu que se pase “dos anuncios á execución” e reclamou que se cumpran os compromisos adquiridos con Val do Dubra.
