O presidente da Deputación da Coruña, Valentín González Formoso, visitou esta mañá o municipio acompañado do alcalde, Diego Luís Díaz, para abordar o inicio das obras de mellora integral da travesía de Bembibre (DP-1914) e os accesos ao futuro polígono industrial.
Transformación integral da travesía de Bembibre
Formoso destacou que o proxecto está pendente só de completar os acordos de expropiación e subliñou que permitirá levar a cabo «unha transformación integral da travesía, cunha clara prioridade na seguridade viaria e na mobilidade peonil, así como na mellora da accesibilidade e da calidade do espazo público urbano».
Segundo o presidente, trátase dun proxecto «froito dun proceso longo, acordado co Concello e coa veciñanza, pensado para mellorar a seguridade e a calidade de vida no núcleo de Bembibre». Destacou tamén o incremento do investimento provincial: «É un investimento importante, que incrementamos de 700.000 euros ata os actuais 1,1 millóns, e que ademais de mellorar a seguridade viaria no centro do pobo, supón unha clara aposta por un modelo de urbanismo máis humano e sostible».
Apoio da Deputación ao Polígono cun novo acceso
En relación co acceso ao futuro polígono industrial, Formoso asegurou que «a Deputación está disposta a apoiar a creación do polígono industrial coa execución dun novo acceso» e resaltou que se trata dunha «inversión de futuro»: «Estamos a falar da adquisición de 90.000 metros cadrados para promover chan industrial, unha aposta clara para que as empresas que xa existen e as que queiran instalarse en Val do Dubra teñan aquí unha oportunidade real».
Durante a visita, Formoso e Díaz tamén acudiron ao Centro de Día e Ocupacional de AVANTE en Niveiro, onde o presidente entregou un novo vehículo para o transporte das persoas usuarias e destacou o apoio continuado da Deputación ás entidades sociais sen ánimo de lucro.
Acompañaron ao presidente da Deputación e o alcalde nesta visita a Val du Dubra, concelleiros do equipo de goberno e tamén do Partido Popular.
