O alcalde de Val do Dubra, Diego Luis Díaz Méndez (PSOE), fixo pública a través das súas redes sociais unha reflexión persoal sobre as polémicas que afectan ao PSOE nas últimas semanas e meses, unha situación que, segundo recoñece, lle provoca “fondísima preocupación” e que entende que tamén afecta “a unha parte moi importante da cidadanía”.
No seu escrito, o rexedor socialista comeza manifestando o seu “absoluto apoio e respaldo a todas as mulleres que sufriron situacións de acoso ou abuso por algún compañeiro”, situando este punto como unha cuestión prioritaria no contexto actual.
«Descalabro absoluto»
Díaz Méndez considera que, ante o que define como unha situación de “descalabro absoluto”, chegou o momento de que “cada cargo asuma a súa responsabilidade” e de que se produzan “os cambios necesarios, tanto nas direccións do partido como no ámbito institucional”.
O alcalde de Val do Dubra vai máis alá e defende que “é preciso que o pobo se pronuncie á maior brevidade posible, tamén a nivel estatal, a través da convocatoria dunhas eleccións xerais”, subliñando que este proceso debe levarse a cabo “caia quen caia”.
Na súa reflexión, aposta por unha renovación profunda do proxecto socialista, reclamando “un cambio xeracional, con xente que chegue á política para traballar e mellorar a vida da cidadanía, e non para roubar, acosar ou abusar de ninguén”. Ademais, advirte de que “non nos podemos permitir o luxo de dar leccións e logo non actuar conforme a elas”.
Finalmente, Diego Luís Díaz Méndez lembra que dentro do Partido Socialista “somos moitas e moitos, estou seguro de que a gran maioría, os que todos os días saímos da casa con ganas e ilusión de facer o noso traballo dun xeito honrado e ético”, e lamenta que este tipo de situacións “non fan máis que afastarnos da primeira liña dun proxecto que tantos froitos deu ao noso país”.
