Darío Capelo, copromotor xunto con Graciela Castro do proxecto Chichalovers, explicou en Radio Xallas a evolución persoal e empresarial que o levou a converter un produto tradicional nun negocio de éxito con forte pegada local. O emprendedor destacou que, tras anos afastado do sector gandeiro familiar, sentiu a necesidade de «poñer en valor o que levabamos facendo na nosa casa toda a vida», o que deu lugar á apertura da Carnicería A dos Capelo e, máis tarde, ao nacemento de Chichalovers.
Segundo relatou, a idea xurdiu ao observar a resposta dos clientes: «O 95% da xente que proba o noso chicharrón encantalle», tanto polo sabor como polo valor emocional que espertan estes produtos tradicionais. A oportunidade consolidouse cando atoparon un pequeno local na Porta do Camiño, en Santiago, que encaixaba coa filosofía dun formato sinxelo.
Darío Capelo en Radio Xallas
O papel clave de Graciela Castro e a creación da carta
Capelo subliñou o papel clave de Graciela Castro, que deseñou a primeira carta grazas ao seu coñecemento hostaleiro: «Ela elaborou a primeira carta sen probar os bocatas; probabámolos os demais e todos coincidían en que estaban boísimos». Tamén destacou a implicación do equipo e a aposta pola innovación continua, incluíndo o “Bocata do Chef”, unha proposta mensual creada por cociñeiros convidados.
Recoñecementos e acollida do público
O empresario puxo en valor a acollida recibida en Santiago e nos eventos aos que acoden coa súa food truck: «Sentimos o calor da xente desde o minuto un». Ademais, recoñeceu que os recoñecementos —como o Solete Repsol ou premios da Deputación da Coruña— supuxeron un impulso importante: «Ás veces estamos ata un pouco abrumados de tanto cariño e tanto recoñecemento».
Orgullo polo rural e valor do produto
Capelo defendeu tamén o orgullo polo rural e pola produción propia, que consideran unha garantía de autenticidade: «Temos unha riqueza aquí total e absoluta, non podemos esquecer as nosas costumes nin o que facían os nosos antepasados». Sobre o produto estrela, explicou que o éxito do chicharrón reside en coidar o proceso: boa materia prima, tempos axeitados e atención ao detalle.
Versatilidade gastronómica do chicharrón
Por último, destacou que a creatividade arredor do chicharrón é case infinita, tanto en carta como en eventos: «O chicharrón parece que dá igual o que lle arreboles, que todo lle queda ben». A fidelidade da clientela, tanto local como turística, confirma para el o sentido dun proxecto que combina tradición, innovación e identidade.
Chichalovers como movemento gastronómico e social
No seu paso por Radio Xallas, Darío Capelo explicou que Chichalovers é hoxe moito máis ca unha bocatería especializada en chicharrón. “Intentamos ser tamén un pequeno movemento social”, afirmou, destacando que arredor da marca se impulsan iniciativas gastronómicas, culturais e deportivas.
Vínculo co deporte e cultura: patrocinios e Onda Chicha
Capelo recordou que Chichalovers mantén un forte vínculo co deporte compostelán, como o patrocinio do equipo feminino de baloncesto e a colaboración co Obradoiro, para o que crearon a súa nova mascota, Chicha. Ademais son patrocinadores do Xallas feminino.
Tamén destacou o proxecto cultural Onda Chicha, co que ofrecen visibilidade a bandas emerxentes: “Permitimos que graven un videoclip profesional, teñan unha entrevista en radio e outra nunha revista dixital”. Cada mes escóllese unha banda e, en xuño, celebrarase o Chicha Fest na Sala Capitol.
Crecemento do proxecto e novos pasos
Sobre o crecemento da empresa, recoñeceu que o equipo continúa definindo se o seguinte paso será abrir unha segunda tenda física ou adquirir outra food truck: “Andamos constantemente dándolle ao coco”, sinalou. Con todo, defendiu un avance prudente e sostido: “As cousas fóronse dando pouco a pouco; o ideal é seguir esa liña”.
Produtos estrela e presenza en Madrid Fusión
O emprendedor xalleiro explicou tamén que, aínda que o chicharrón é o produto estrela polo seu tirón entre o público nocturno, o chourizo conserva protagonismo na praza da Abastos e en épocas como o inverno. Ademais, anunciou que a marca participará en Madrid Fusión, tanto coa identidade de Chichalovers como coa Carnicería A dos Capelo, algo que cualificou de “incrible para un proxecto que só leva un ano e medio”.
Un proxecto familiar impulsado polas redes sociais
O empresario admitiu a intensidade dunha actividade que involucra practicamente a toda a familia: “Ás veces temos que poñer límites, porque se non todo o día se fala de traballo”. As redes sociais, subliñou, foron decisivas no impulso do proxecto grazas ao labor de Graciela Castro, á que definiu como “unha crack da comunicación”.
Bo momento e fidelidade da clientela
Finalmente, recoñeceu que a clientela chega por múltiples vías —redes, boca a boca, eventos e mercado— e confirmou que o Nadal é unha boa época para a empresa. Pechou a conversa cun ofrecemento directo ao público.
