A Unión de Ciudadanos Independientes (UCIN) en Galicia anunciou a designación de Álex Regueiro como coordinador da formación e candidato á Alcaldía de Teo nas eleccións municipais de 2027.
Nado en Santiago de Compostela en 1977, Regueiro está vinculado profesionalmente ao mundo da moda e a historia da indumentaria. Comezou a destacar desde moi novo, gañando concursos de creación téxtil con apenas oito anos. Con 18 era recoñecido polo seu dominio do corte e, un ano despois, obtivo o título oficial de artesán. En 1999 presentou a súa primeira colección feminina, inspirada na natureza galega, tras ser discípulo do patronista internacional Santiago Bazarra.
Activista LGTBI+
En 2000 abriu o seu taller en San Domingo, Calo (Teo), especializado na recuperación de traxes antigos —labor que lle reportou 35 premios— e en costura de alta exclusividade. A súa actividade abrangue desde pezas tradicionais ata vestidos de gala, e combina o traballo de deseño coa docencia en moda, protocolo e historia da indumentaria. Tamén colabora en programas de televisión e radio e participa en accións de defensa dos dereitos LGTBI+ no ámbito rural.
Segundo sinala UCIN, entre as liñas principais do seu proxecto político para Teo figuran a defensa da cultura tradicional, a promoción do asociacionismo cultural e deportivo, e a creación dun concello “diverso e inclusivo”. A formación indica que Regueiro é contrario á instalación de proxectos industriais como ALTRI ou a canteira da Casalonga, e que apoia medidas para combater a aporofobia, a xenofobia e calquera forma de discriminación.
Memoria democrática, cohesión das parroquias e os Xenerais da Ulla
Tamén propón declarar Teo como lugar de memoria democrática, impulsar o desenvolvemento local e favorecer a reapertura de tabernas tradicionais como espazos de encontro veciñal. Outra das súas propostas é reforzar o papel do concello como epicentro dos Xenerais da Ulla e traballar para unha maior cohesión das 13 parroquias do municipio.
UCIN describe a súa candidatura como a dun “rapaz da aldea” que quere contribuír a mellorar o concello, combinando a experiencia profesional coa defensa da identidade cultural e o compromiso social.