O alcalde de Val do Dubra, Diego Luis Díaz, e o tenente alcalde, Antonio Negreira, mantiveron unha reunión de traballo coa conselleira de Vivenda e Planificación de Infraestruturas, María Martínez Allegue, para falar sobre as necesidades do concello nesta materia.
Os representantes do goberno dubrés solicitaron unha intervención no núcleo de Portomouro para mellorar a seguridade viaria na estrada AC-455. O Concello comprometeuse a elaborar unha memoria técnica que avalíe as actuacións necesarias para incrementar a seguridade nesta vía.
Outra das demandas abordadas, segundo fontes municipais foi “buscar unha alternativa ao tráfico pesado que circula pola zona, especialmente o que conecta Carballo e Santa Comba con Santiago e que se ve obrigado a cruzar polo núcleo de Portomouro”.
Tamén se plantexou a necesidade dunha mellora na ponte do Portomouro.
O alcalde de Val do Dubra fixo unha valoración positiva desta xuntanza.
