O goberno local de Val do Dubra, presidido en funcións polo popular José Manuel Varela Ferreiro, despediu o seu mandato informando das últimas subvencións aprobadas.
Segundo estas fontes, nos últimos días aprobaronse varias axudas. A través do Fondo de Cooperación local hai unha axuda de 29.000 euros para a adquisición dunha rozadora de brazo para a limpeza de cunetas e outra de 46.000 euros para a mellora das infraestruturas de abastecemento.
Do Fondo de Compensación Ambiental están concedidos 39.000 euros para a compra, xunto co concello de Trazo, de dúas rozadoras para o mantemento de camiños.
Local cultural na Cámara Agraria
Tamén deron conta da concesión por parte da Dirección Xeral de Cultura da Xunta de 28.500 euros para a posta en marcha dun local cultural no edificio da Cámara Agraria.
Por último, o goberno saínte xestionou unha axuda para a mellora da envolvente do Auditorio Municipal. Foille concedida unha achega de 40.000 euros.
A partir deste sábado 17 de xuño comezará un novo ciclo político co socialista Diego Luis Díaz como alcalde, grazas ao acordo acadado entre PSOE e Anova.
