O conselleiro de Cultura, Educación, Formación Profesional e Universidades, Román Rodríguez, achegouse o concello da Baña para anunciar a licitación das obras de rehabilitación integral do Colexio Público Integrado de San Vicente.
O proxecto contempla un investimento de 1.161.179,44 euros. Segundo explicou Román Rodríguez, entre as actuacións previstas inclúense traballos nas cubertas e fachadas para mellorar a impermeabilización da estrutura e tarefas de carpintería exterior.
Tamén se actuará nos acabados interiores e nas instalacións (aseos, instalación eléctrica e iluminación) e renovaranse un total de 121 ventás e 300 luminarias.
“Queremos renovar e acondicionar o colexio adaptándonos ás novas necesidades do alumnado e profesorado e seguindo as pautas do Plan de Nova Arquitectura Pedagóxica que, cun investimento de 191 millóns, estamos facendo máis confortable e sustentables os centros escolares galegos”, remarcou o conselleiro de Educación.
«Algúns pensaban que este goberno vendía fume»
Para o alcalde da Baña, Andrés García Cardeso, o anuncio de Educación “é unha moi boa nova; os nenos e as nenas da Baña terán unhas infraestruturas educativas en condicións”, dixo.
Tamén quixo remarcar que “a rehabilitación integral do CPI de San Vicente da Baña é unha realidade, en contra da opinión do que algúns pensaban de que este goberno municipal vendía fume”.
