Os concellos de Val do Dubra e Trazo contan con dous puntos limpos móbiles para prestar servizo nas diferentes parroquias dos dous municipios.
Trátase dunha mellora financiada pola Consellería de Medio Ambiente grazas á xestión dos alcaldes José Manuel Varela (Val do Dubra) e Fina Suárez (Trazo). O importe total dos vehículos ascenden a 75.000 euros, sendo a achega da administración autonómica de 67.500 euros. O resto afróntase con fondos propios.
Son dous camións equipados con “gancho multilift” e que xa foron recepcionados por parte dos concellos. Con este servizo, achégase a posibilidade da reciclaxe ós núcleos rurais avanzando na correcta xestión dos residuos domésticos.
Equipados para distintos tipos de residuos
O punto limpo móbil contén varios apartados para poder depositar diferentes fraccións que se poden reciclar como é o caso de pequenos electrodomésticos, pilas, roupa ou xoguetes.
De feito contan con apartados para depositar aceites vexetais usados, lámpadas e fluorescentes, papel e cartón, pilas e baterías, roupa, pinturas, vernices e disolventes, xoguetes e residuos de aparatos electrónicos.
Desde os concellos de Val do Dubra e Trazo agradecen a axuda económica da Xunta e animan á veciñanza a usar este novo servizo, para avanzar no coidado do medio ambiente e na loita contra o cambio climático.
