Val do Dubra e Negreira continuarán prestando xuntos o servizo de atención temperá. Luns, martes e mércores en Negreira (rúa Castelao) e os xoves e venres en Val do Dubra (Centro de formación- Rúa Corredoira- Bembibre).
Os alcaldes destes municipios, José Manuel Varela Ferreiro e Ángel Leis Míguez, asinaron un novo convenio para o mantemento desta Unidade de Atención Temperá que está operativa desde o pasado mes de marzo e na actualidade atende a uns 63 nenos e nenas de 0 a 6 anos.
Tamén asistiron ao acta de sinatura a concelleira de Servizos Sociais de Val do Dubra, Rosa Parafita e a súa homóloga en Negreira, María del Mar García.
Esta Unidade de Atención Temperá conta con catro especialistas distribuidas en catro áreas: conductal; cognitiva, linguaxe e psicomotora.
Os alcaldes valoran o servizo
Para Manuel Ángel Leis Míguez, alcalde de Negreira é un servizo “fundamental” e que seguirán “nesta liña de colaboración pola boa valoración que fan os técnicos do servizo e sobre todo as familias, que son as que realmente teñen que decir se están contentos coa prestación”.
Pola súa banda, José Manuel Varela Ferreiro , alcalde de Val do Dubra, salientou o feito de que comparten a mesma filosofía que Negreira, de que é “un servizo esencial que naceu froito da colaboración entre os dous concellos e de que debemos dar todo o noso apoio ás familias”.
