A conselleira de Política Social, Fabiola García, visitou este venres a Casa do Maior de Val do Dubra, nunha xornada de portas abertas.Estivo acompañada polo alcalde, José Manuel Varela Ferreiro, a concelleira de Servizos Sociais, Rosa Parafita e outros membros da corporación.
Na súa visita, Fabiola García anunciou que Galicia superará os 110 destes centros antes de que remate o ano. Precisamente no día no que o Diario Oficial de Galicia (DOG) publicaba unha nova convocatoria para crear 30 novas casas do maior que se sumarán ás 83 xa en funcionamento.
A conselleira destacou que deste xeito poranse a disposición dos concellos sen centro de día 150 prazas gratuítas de atención próximas ás súas casas. A nova orde conta cun orzamento de 2,9 millóns de euros o que permitirá, ademais da posta en marcha destas novas unidades, incrementar en 5000 euros a axuda ás casas do maior máis lonxevas.
Desde o concello de Val do Dubra informan que as persoas interesadas neste servizo deberán contactar cos servizos sociais municipais.As Casas do Maior son un servizo gratuíto de atención diúrna a persoas maiores de 60 anos, cun máximo de cinco prazas cada unha para asegurar o coidado personalizado.