O alcalde da Baña, José Antonio Pereira Gil, permanecerá illado no seu domicilio ata o vindeiro 21 de setembro por ter estado en contacto co traballador do Concello que o luns, día 7, deu positivo na covid-19.
Malia dar negativo nunha proba PCR desde a Consellería de Sanidade insistiron en que debería de gardar corentena. Polo tanto o mandatario teletraballará desde a súa casa.
Ata o momento, as autoridades sanitarias tan só decretaron o illamento domiciliario do alcalde, que estivo en contacto co traballador municipal que o pasado luns deu positivo en coronavirus. O resto de persoal do concello pode seguir acudindo ao seu posto de traballo.
A concelleira de cultura e o traballador municipal evolucionan favorablemente
Tanto a concelleira de cultura como o traballador municipal atópanse illados nas súas casas e evolucionan favorablemente.
Ante esta situación, o mesmo luns, o Concello ofrecéulles a todos os traballadores e traballadoras municipais a posibilidade de facer probas diagnósticas (PCR ou test serolóxicos), que en todos os casos deron negativo.
José Antonio Pereira recoméndalle a veciñanza utilizar a asistencia telefónica e telemática para realizar as xestións que necesiten facer coa administración local, para evitar aglomeracións na casa consistorial.
