Audio coa entrevista en Radio Xallas a Diego Díaz desde o minuto 14
O portavoz municipal do PSOE en Val do Dubra bota en falta que o goberno tripartito non apunte unha dirección clara:»Criticamos a falta dunha liña estratéxica. Este goberno non ten un plan que teña uns obxectivos. De momento non o coñecemos».
Considera ademais desexable que se expuseran «as bases do acordo de goberno» entre PP, Terra Galega e Independentes. Indicou que os tres grupos «xuntáronse por necesidade» e lembrou as «diferencias públicas que tiveron no pasado».
Cuestións de despacho
Diego Díaz Méndez pensa que nestes primeiros meses hai feitos que «non podemos destacar como positivos» xa que a acción do goberno de José Manuel Varela está centrada «en atender cuestións ordinarias de despacho».
Considera interesante o Polígono industrial pero explica que «a comisión que se creou ainda non se convocou nunca». Para o edil socialista o do parque empresarial é «un investimento arriscado porque non sabemos realmente a demanda que imos ter pero temos que facelo».
Oposición seria, responsable e propositiva
Díaz asegura que o seu grupo realizará «unha oposición seria, responsable e propositiva». Insiste na necesidade de aprobar un orzamento «é esencial e totalmente necesario».
Tamén son asuntos fundamentais o Centro de Día, os servizos sociais e «sacar adiante o Plan Xeral». Lembra que demandou no pleno fomentar a participación veciñal da xente «con garantías» e lamenta que posteriormente o goberno «intentara colgarse un mérito con xuntas parroquias» que non foron moi concorridas.
