A directora xeral de Xuventude reuniuse cos rexedores de Santa Comba, A Baña e Padrón.
A directora xeral de Xuventude, Participación e Voluntariado da Xunta de Galicia, Cecilia Vázquez Suárez,saudou que os concellos de Padrón, Santa Comba e A Baña se acolleran ao programa “Europa cos Cidadáns”, para irmandarse con outras localidades europeas e desenvolver cooperacións mutuas en proxectos e accións dirixidos á mocidade entre entidades, asociación e municipios de diferentes países”.
Vázquez mantivo un encontro coa alcaldesa xalleira, María Pose, e cos rexedores Andrés García Cardeso (A Baña) e Antonio Fernández Angueira(Padrón). A directora xeral destacou que este programa “favorecerá o feito de que a mocidade destes tres concellos poidan ter novas oportunidades para o entendemento mutuo con outros mozos e mozas de Europa, así como o fomento da solidariedade, a aprendizaxe intercultural, o compromiso social e o voluntariado a nivel europeo”.
“A igualdade de xénero fai unha Europa mellor”
O concello de Santa Comba promove unhas xornadas denominadas “A igualdade de xénero fai unha Europa mellor” que se desenvolverán entre o 28 de maio e o 3 de xuño, coa participación de 45 mozos de concellos de Eslovaquia, Italia, Portugal e Grecia.Entre outras actividades realizaranse conferencias, reunións e obradoiros nos que se reflexionarán sobre as medidas para a igualdade de xénero que existen hoxe en día nos diferentes municipios, rexións e países. O obxectivo deste encontro é promover estratexias e enfoques innovadores para abordar as cuestións prioritarias no contexto da igualdade de oportunidades.
“Fomentar a solidariedade para unha Europa mellor”
O proxecto do concello de Padrón titúlase ‘Fomentar a solidariedade para unha Europa mellor’. Trátase dun irmandamento no que participan cidades de Portugal, Italia, Eslovaquia, Grecia, Hungría e Alemaña. Este evento, que ten como finalidade sensibilizar á sociedade civil europea sobre as oportunidades que proporciona o feito de pertencer á Unión Europea, terá lugar entre os días 14 e 20 de maio e reunirá a 55 persoas dos sete países participantes.
“Alianza de irmandamento para a acción en solidariedade social”
Pola súa banda, o concello da Baña desenvolverá o proxecto ‘Alianza de irmandamento para a acción en solidariedade social’, do 6 ao 12 de marzo. Esta acción terá lugar en Cerdeña, Italia, onde os participantes desta localidade galega se encontrarán con participantes italianos, de Polonia, Romanía e Letonia.
Fonte- Redacción AG- Nota Xunta
