Antonio Negreira, alcalde do Val do Dubra:»As Constitucións cámbianse, modifícanse e desde logo para o teito de gasto cambiouse a Constitución nun minuto ou nunha noite». Vídeo Adiante TV.
A corporación local do Val do Dubra aprobou unha moción do Partido Popular de “rexeitamento ao referendo secesionista” de Cataluña. Os populares encontraron o apoio de Terra Galega e da Agrupación Dubresa Independente.O alcalde e concelleiro de Anova, Antonio Negreira, anunciou o voto en contra e defendeu a consulta que se pretende levar a cabo, aínda que asegurou falar desde «un criterio político e non de goberno».
“Estamos en contra de que non se admita o dereito a decidir” afirmou Antonio Negreira que considera que se trata dun “dereito básico” e polo tanto posicionouse “en contra dos criterios que está a seguir o goberno do estado para solucionar este problema”.
Antonio Negreira:»Non queremos a ninguén a forza en ningún sitio»
Para o alcalde do Val do Dubra “se existe un problema hai que darlle unha solución.Non queremos a ninguén a forza en ningún sitio. Hai que encantar, hai que convencer aos pobos para que queiran estar dentro do estado”.
Negreira Noya ten claro que “as Constitucións cámbianse, modifícanse e desde logo para o teito de gasto cambiouse a Constitución nun minuto ou nunha noite». E criticou a actuación do executivo que preside Mariano Rajoy en todo este proceso xa que entende que «por parte do goberno de Madrid hai un procedemento que está a agravar o conflito e a favorecer a secesión, a que din que non queren que exista».