Adiante Galicia

A Paulino Castiñeira Castro contacteino fai anos para unhas crónicas que estaba facendo para a Agencia EFE, sobre unha das iniciativas da Sociedade Filatélica de Corcubión. A través da liña telefónica escoitei a un home entusiasta e servicial.

Décadas despois volvemos a encontrarnos a través das redes. Paulino lembroume a importancia histórica de Corcubión e a relevante traxectoria de varios dos seus fillos. Pedía difundir as historias da vila de San Marcos e ofrecía algún consello. A través das redes sociais recibín palabras dun home comprometido coa terra e interesado pola difusión do coñecemento.

E acabou colaborando con varios artigos seus en Adiante Galicia.“Aquellas verbenas” ou “Lugar, O Son, despensa da vila” foron artigos que quixo que se publicaran no noso xornal.

Son só un simple exemplo de todo o material que nos deixou. No seu blogue contou unha morea de cousas. Falounos da Orquesta La Palma, de Ramón Pais Romero, Ramón Caamaño, e de distintos episodios históricos. Tamén é autor de dous libros.

Entereime que emprendeu unha viaxe. Que nos deixou. E non quería deixar pasar a oportunidade de volver a darlle as grazas polo seu espíritu colaborativo e a súa vocación divulgadora. Grazas Paulino!