Foi emocionante…. E xa formaN parte das nosas mañás radiofónicas. Refírome a esas mensaxes que recibimos para iniciar a tempada.
E en nome da audiencia de “Na Encrucillada” estoulles moi agradecido, a todas estas amizades que nos prestaron as súas voces e os seus corazóns durante uns segundos.
Chegaba desde Uruguai o saúdo de Toni de Seárez, desde o programa máis antigo en lingua galega “Sempre en Galicia”, lembrándonos a importancia da comunicación, do noso idioma e da nosa cultura.
E tamén o “Viva Santa Comba” da xornalista xalleira Esperanza Calvo, que agora saúdanos todos os días desde as ondas xalleiras.
E a escuma salgada de Arou agromando da voz da polifacética artista, Belem Tajes.
Da Terra de Soneira, outra brava muller que canta coma os anxos, Irma Macías, dedicaba unhas verbas ó regreso de “Na Encrucillada”.
O mestre Pablo Seoane deixou a gaita un intre, para saudar a unha terra que o apreza.
Alberto Suárez, do Trío Alborada, despois dun verán ateigado de sesións vermú e verbenas, non quixo deixar a oportunidade de saudar a audiencia de Radio Xallas.
Pois para Toni de Seárez, Esperanza Calvo, Belem Tajes, Irma Macías, Pablo Seoane e Alberto Suárez, grazas, grazas e que saiban que xa forman parte do noso arquivo sonoro.
