Capital, terra e traballo. Eses son os tres piares fundamentais para levar a cabo calquera actividade económica. Sen embargo no factor do traballo non se valorou sempre indistintamente a labor do home e máis da muller. As amas de casa do século pasado, as nosas ascendentes, eran as que levaban aquelas pesadas leiteiras durante quilómetros para a súa venda. Eran esas mesmas mulleres as que ían ás feiras vender ovos, un ben tan prezado por aquel entón.
E logo, a Historia, ese desvirtuamento ás veces da realidade, teima en concibir ao home como o sustentador das economías familiares. Pode que ás mulleres non traballasen fóra pero o que é un feito é a súa repercusión na economía do tempo, ás veces un dato relegado a esquecer.
A día de hoxe, as mulleres que traballan no sector agrario continúan colaborando nas rendas das súas casas e fomentando o traballo da terra. Temos así mesmo unha clara profesionalización , ver unha muller tractorista xa non constitúe un feito insólito.
Avanzaron moito os seus dereitos mais aínda queda un longo treito por percorrer. O día en que a igualdade legal se equipare coa real será un paso xigante non só para elas, tamén para o feminismo en xeral.
A Unesco recoñeceu no 2008 tódolos 15 de outubro como Día Internacional das Mulleres no Rural, unha data para recoñecer a figura feminina na agricultura e na gandaría e seguir denunciando as aínda usuais discriminacións por sexo.
Hoxe, nun día marcado por actualidades que ás veces desvían a atención doutros eidos, cómpre celebrar e loar o papel de xeracións de avoas, nais e fillas que queren vivir do agro.
