Non lle faltaba razón ao político laborista británico Harold Wilson cando dicía que en política unha semana é moito tempo. Nunhas horas ou nuns días pódese desmoronar o castelo de naipes de calquera dirixente ou organización.
Pero non é menos certo que para a estratexia política a cousa é diferente. Un ciclista pode quedar sen forzas a poucos quilómetros da meta e estragar todo o traballo dun ano nuns minutos, pero o traballo de preparación fíxoo chegar ata aí. E o normal é sempre que o que traballa, loita e se esforza ten moitas posibilidades de triunfar. Aínda que tamén hai carambolas e golpes de sorte.
As eleccións municipais serán aproximadamente dentro de vinte meses. Pode parecer unha barbaridade pero é o momento de engraxar as maquinarias e ir dando pasos. Cando un dirixente asegura que falta unha eternidade, penso que ou ben trata de despistar aos rivais ou está xogando erradamente.
As estratexias políticas necesitan planificación, equipos, mensaxes e iso non é cousa dunha campaña electoral de quince días. É certo que unha noticia dun día pode cambiar as previsións e o mesmo escenario, pero salvo cuestións extremas, o traballo feito é un investimento de futuro.
A campaña electoral non é máis que o colofón a todo un proceso de traballo. A un cronograma planificado segundo sexa o candidato do goberno ou da oposición, novo ou veterano, etc… E despois está a habilidade de afrontar o día a día. Xogando unha partida coas cartas que vaian saíndo día a día. Percibindo o contacto da rúa. Pero con planificación e cunha estrutura perfectamente artellada todo será máis factible. Incluso cando haxa que reaccionar en tempo récord. Aí notaranse as maquinarias engraxadas e ordenadas.
O tempo pasa voando. E como podemos ver a través dos medios de comunicación algúns políticos xa están traballando. Outros prefiren facelo desde a sombra sen chamar atención. E hainos que xa fan cálculos mentais para poder acertar cos seus compañeiros de viaxe. As listas son sempre unha arma de dobre fío.
Como dicía Wilson unha semana é moito tempo en política. De acordo. Pero insisto, vinte meses non son tantos para os candidatos gañadores.
Xosé Manuel Lema dirixe Adiante Galicia e é autor do libro «El Candidato Ganador.Cómo organizar campañas electorales para ganar unas elecciones (Marketing Político)
