A Xunta e representantes das organizacións agrarias e dos consellos reguladores das denominacións de orixe vitivinícolas acordaron manter a reclamación ao Goberno central para que permita o uso de drons na aplicación de determinados tratamentos fitosanitarios fronte ao verme defoliador do millo e ás enfermidades fúnxicas da vide, especialmente en zonas de difícil acceso ou condicionadas pola orografía.
O director xeral de Gandaría, Agricultura e Industrias Agroalimentarias, José Balseiros, e o director da Axencia Galega da Calidade Alimentaria, Martín Alemparte, abordaron esta cuestión nunha xuntanza con representantes de Unións Agrarias (UUAA), da Asociación Agraria de Galicia (Asaga) e dos consellos reguladores vitivinícolas.
Durante o encontro, os responsables autonómicos informaron de que o Ministerio de Agricultura, Pesca e Alimentación denegou as autorizacións excepcionais solicitadas pola Consellería do Medio Rural para realizar aplicacións aéreas destes produtos mediante drons.
Segundo trasladou a Xunta, a normativa estatal que regula estes procedementos está baseada na utilización de aeronaves tripuladas e non contempla o emprego de drons, aos que atribúe unha menor incidencia ambiental e unha maior precisión na aplicación dos tratamentos.
Adaptación da normativa
O Goberno galego sinalou que continuará reclamando ao Ministerio que promova ante a Unión Europea unha adaptación da normativa para permitir este tipo de aplicacións en condicións ordinarias, sen necesidade de declarar previamente unha praga, así como autorizar tratamentos específicos para o verme defoliador do millo e as enfermidades da vide.
Pola súa banda, Unións Agrarias defendeu que, polas características do territorio galego, marcadas polo minifundio, a dispersión parcelaria e unha orografía complexa, os drons constitúen unha alternativa para a aplicación de fitosanitarios. A organización sostén que a proposta non implica incrementar o uso destes produtos, senón mellorar a súa aplicación para aumentar a eficacia e reducir a deriva, mantendo os obxectivos de redución fixados pola normativa europea.
