O presidente da Xunta, Alfonso Rueda, asinou este mércores un protocolo de colaboración coa Fundación Adolfo Domínguez para poñer en marcha a denominada Iniciativa galega polo liño, un proxecto co que se pretende recuperar o cultivo desta fibra en Galicia e crear un ecosistema produtivo e industrial arredor da súa produción.
Segundo informou a Xunta, o acordo conta cun orzamento inicial de máis de 887.000 euros e inclúe liñas de investigación, desenvolvemento agronómico e validación industrial da fibra, en colaboración co sector téxtil galego. O obxectivo é reintroducir un cultivo que actualmente ten unha presenza residual na comunidade.
Rueda destacou que o liño pode converterse nunha oportunidade para dinamizar o rural e reducir a dependencia de materias primas importadas. “Trátase de revitalizar algo que tivemos durante miles de anos no noso rural”, sinalou o presidente, quen tamén subliñou a dimensión económica do proxecto e a necesidade de transferencia de coñecemento para garantir a súa viabilidade.
A iniciativa inclúe a multiplicación de sementes, a caracterización agronómica e xenética de variedades e a creación de campos de ensaio no Centro de Investigacións Agrarias de Mabegondo e nos centros de formación de Guísamo, Sergude e Monforte, dependentes da Consellería do Medio Rural. Estes espazos permitirán obter semente para futuras plantacións en distintas zonas de Galicia.
Durante o acto, celebrado no Centro de Formación e Experimentación Agraria de Guísamo, Rueda tamén enmarcou o proxecto na identidade cultural galega e na aposta pola marca Galicia Calidade.
A Xunta complementa esta estratexia con medidas de economía circular e reciclaxe téxtil, mentres avanza na construción dunha planta pública de separación de residuos téxtiles en Sogama, cun investimento superior aos 22 millóns de euros.
Pola súa banda, a Fundación Adolfo Domínguez e a firma Adolfo Domínguez destacan a alta demanda de liño no mercado e o potencial de Galicia para posicionarse neste sector. A presidenta da Fundación Adolfo Domínguez, Adriana Domínguez explicou que hai moi demanda deste tecido de alta calidade e que Galicia podería converterse nun referente desta industria como é Flandes.
