O director xeral de Gandaría, Agricultura e Industrias Agroalimentarias, José Balseiros, visitou a Cooperativa Xallas, no concello de Santa Comba, para coñecer os investimentos realizados coa colaboración da Consellería do Medio Rural.
A entidade recibiu unha axuda de 100.000 euros destinada á construción dunha nave almacén para gardar produtos destinados exclusivamente aos socios, entre eles forraxes, abonos e produtos fitosanitarios.
Durante a visita, Balseiros destacou que este tipo de achegas contribúen a incrementar o valor engadido das producións agrarias e a fortalecer a actividade económica no territorio.
Liñas de axudas da Xunta de Galicia
A convocatoria correspondente ao período 2026-2028 conta cun orzamento de 19 millóns de euros e inclúe dúas liñas de apoio, unha centrada en investimentos con obxectivos ambientais e outra orientada á transformación e comercialización das producións agrarias.
Segundo lembrou o representante da Xunta, desde o ano 2016 destináronse máis de 195 millóns de euros para apoiar 614 proxectos vinculados á transformación e comercialización de produtos agroalimentarios en Galicia.
