A empresa xalleira Elmega cumpriu 50 anos cunha festa de celebración nas súas instalacións do Camiño Vello de Mourelle en Santa Comba, onde non faltou a boa gastronomía (pulpo e churrasco) e a música, para compartir ese momento histórico cos seus empregados e clientes. Máis de medio milleiros de persoas chegadas desde distintos puntos de Europa.
O evento contou coa presenza da conselleira do Medio Rural, María José Gómez, que definiu a esta empresa como un referente da innovación do sector agrogandeiro en Galicia.
Gómez recalcou que detrás de cada avance tecnolóxico hai un obxectivo moi claro e importante por parte de Elmega, “facerlle a vida máis fácil ás persoas que traballan todos os días no campo”. Afirmou que ao longo dos anos a empresa afincada en Santa Comba logrou desenvolver unha tecnoloxía propia, rexistrar patentes e modelos industriais e consolidarse como un referente dentro e fóra de Galicia.
Tamén fixo fincapé no compromiso de Elmega co territorio. Expresou que, nun momento no que a innovación se adoita vincular aos grandes centros urbanos, esta empresa demostra que tamén dende o rural se pode crear industria, xerar emprego, desenvolver tecnoloxía e competir nos mercados internacionais.
A corporación municipal de Santa Comba tamén estivo representada polo seu alcalde, Alberto Romar e pola portavoz do PP, María Pose.
