O cabalo de Pura Raza Galega continúa consolidándose como un dos símbolos máis representativos do patrimonio etnográfico e gandeiro do país. Tras máis de dúas décadas de traballo arredor da conservación e promoción desta raza autóctona, o presidente desta asociación, Xacobo Pérez Paz, reivindica o valor histórico, cultural e funcional dun animal que acompañou durante séculos a vida no rural galego.
Segundo explica, a iniciativa de impulsar oficialmente a raza naceu tras visitar importantes feiras internacionais de cabalos en Europa. “Eu vía uns cabalos moi similares aos nosos, que había nos montes e nos curros de Galicia, e que noutros países estaban prestixiados como razas propias”, sinala. A partir desa reflexión, un grupo de gandeiros iniciou os trámites para lograr o recoñecemento oficial da raza e a creación do correspondente libro xenealóxico.
Tronco celta atlántico europeo
Pérez define o cabalo galego como “un pequeno cabalo hipométrico e subconcavilíneo de tronco celta atlántico europeo”, adaptado historicamente ás condicións orográficas e climáticas do territorio galego. Lembra tamén que existen referencias documentais xa na época romana sobre estes animais, coñecidos pola súa resistencia e capacidade de movemento en terreos difíciles.
“O cabalo quitou moito traballo ao longo dos séculos”, afirma. Segundo relata, estes animais desempeñaron funcións fundamentais no transporte, nos labores agrícolas e mesmo na comunicación entre aldeas. “Antes de comezar a xantar servíaselle primeiro á besta; se a besta non estaba atendida, non se sentaban os comensais á mesa”, lembra.
A asociación celebra este ano os 25 anos da Copa Galicia de Pura Raza Galega, un percorrido que o presidente define como “un camiño sen frechas amarelas”, no que foi necesario abrir novas vías de promoción e conservación da raza. Durante este tempo organizáronse competicións morfolóxicas, exhibicións de doma e actividades de difusión en diferentes puntos de Galicia.
Ademais, destaca a colaboración con institucións internacionais e universidades europeas. “Posicionamos a nivel internacional unha raza que vén dos tempos romanos”, asegura. Entre as iniciativas impulsadas figura tamén a creación da credencial equina para os peregrinos que realizan o Camiño de Santiago a cabalo.
Xacobo Pérez insiste en que o cabalo galego representa “unha identidade propia etnográfica, cultural e gandeira de Galicia” e considera esencial seguir apostando pola súa conservación. “Hai milleiros de quilómetros percorridos, moitísimo traballo e moita ilusión detrás de todo isto”, conclúe.
