O gandeiro Iván García, da Gandería O Rubio de Santa Comba, destacou o esforzo acumulado durante anos de preparación como clave no éxito acadado pola vaca Barni no recente concurso autonómico de Moimenta, onde o exemplar obtivo a máxima distinción.
Durante a entrevista en Radio Xallas, García explicou que a preparación destes animais require unha dedicación constante e prolongada no tempo, cun traballo que se estende durante meses e mesmo anos. “Xa levamos un par de anos traballando”, indicou, en referencia ao proceso seguido con Barni antes de chegar á competición.
O gandeiro incidiu en que o resultado final depende de múltiples factores e que os detalles xogan un papel determinante: “Calquera detalle mínimo, calquera fallo que poidas cometer, pois é o que fai que pases do primeiro posto a poder quedar o último”. Neste sentido, subliñou a importancia da posta a punto nos días previos ao concurso.
García tamén puxo en valor o papel do seu irmán Iker no desenvolvemento do animal, asegurando que “del débolle moito ao meu irmán, que é quen máis pelexou con esta vaca”.
Entrevista en Radio Xallas
Barni, de catro anos de idade e cunha destacada produción leiteira, xa destacara en anteriores certames. En canto ás características da vaca, o gandeiro describiuna como un animal esixente no manexo diario: “É unha vaca delicada, que ao mínimo xa está intranquila”. A pesar diso, resaltou a súa actitude en competición, onde responde con seguridade: “Gústalle saír á pista”.
Sobre o proceso de preparación, comparouno co adestramento dos deportistas de elite: “Intentamos que estean ben fisicamente e traballamos con elas”, explicando que o coidado inclúe tarefas continuas como o lavado, o corte de pelo e o control da alimentación, no caso de Barni cunha selección personalizada.
Ademais, destacou que a motivación principal para participar nestes concursos non é económica, senón vocacional: “Isto dos concursos non é por cartos, é unha paixón”. Segundo indicou, o obxectivo é ver recompensado o traballo realizado co paso do tempo.
Finalmente, cualificou a experiencia como especialmente relevante a nivel persoal, destacando o valor de compartila co seu irmán: “Para min foi un momento moi especial”, sinalou.
Un auténtico orgullo que unha gandería de Vilamaior, no concello de Santa Comba, sexa un referente en toda Galicia.
