O secretario xeral de Unións Agrarias, Roberto García, defendeu en Radio Xallas unha posición de vixilancia sobre o acordo entre a Unión Europea e Mercosur, aínda que tamén subliñou as oportunidades que pode representar para o sector gandeiro galego.
Segundo explicou, “hai motivos para estar atentos a que se cumpra o firmado”, polo que reclamou controis e garantías para que se respecte o pactado e exista igualdade de condicións para os produtores europeos.
Ao mesmo tempo, destacou a importancia do tratado para asegurar a chegada de materias primas destinadas á alimentación animal, fundamentais para o funcionamento das explotacións. “Desde o sector leiteiro, incluso desde o sector gandeiro, o tratado de Mercosur é unha garantía de abastecemento de alimentación”, afirmou.
Roberto García lembrou que o sector destina cada ano unha elevada cantidade económica á compra destes produtos, ao sinalar que “case setecentos millóns de euros gastamos todos os anos” en pensos e insumos para a cabana gandeira.
Nesa liña, indicou que “ter garantido que do Mercosur van seguir vindo vía barcos tres millóns de toneladas” de cereais, soia e outras materias primas para pensos supón unha garantía de estabilidade para o campo galego.
O dirixente agrario tamén advertiu da necesidade de supervisar a entrada doutros produtos sensibles, especialmente a carne, para evitar competencia desleal. Neste sentido, insistiu en que cómpre velar polo cumprimento das cotas, controis sanitarios e condicións de produción esixidas na Unión Europea.
Para García, o acordo pode abrir posibilidades comerciais e asegurar subministracións básicas, pero sempre que vaia acompañado de reciprocidade, transparencia e defensa dos intereses do campo galego.
