A Consellería do Medio Rural activará un plan especial de control sobre o sector lácteo e remitirá á Comisión Galega da Competencia toda a información relativa á renovación dos contratos, segundo anunciou este martes a conselleira María José Gómez durante unha visita ao Porriño.
A responsable autonómica explicou que esta decisión responde ás denuncias sobre a posible entrada de leite procedente doutros países e ao contexto de renovación contractual, marcado por baixadas de prezos que a Xunta considera “inxustificadas”.
A conselleira detallou que, ademais das inspeccións rutineiras, “implementamos un plan especial de control” para reforzar a vixilancia do sector. Neste sentido, a Administración galega revisará “todos e cada un dos contratos” asinados pola industria co obxectivo de comprobar que non existen incumprimentos. No caso de detectalos, a información será trasladada á Comisión Galega da Competencia para a súa análise e posibles actuacións.
Medidas de control
O plan inclúe tamén controis “estritos” ás cisternas que entren en Galicia procedentes doutros países, co fin de verificar tanto a calidade do leite como o prezo ao que se introduce no mercado. A Xunta pretende así evitar situacións de competencia desleal que poidan prexudicar aos produtores galegos. De existir irregularidades, estas tamén serán comunicadas ao organismo competente.
Ademais, a Consellería supervisará que todo o leite importado cumpra coa etiquetaxe obrigatoria da Unión Europea, garantindo a súa rastrexabilidade.
Estas medidas chegan tras unha renovación dos contratos lácteos á baixa, nun contexto no que, segundo indicou Gómez, a Administración autonómica mantivo contactos coa industria, a distribución, os produtores e os sindicatos sen lograr evitar esa caída nos prezos.
A conselleira sinalou que actualmente hai 20 expedientes abertos en relación co sector e reiterou o obxectivo de “protexer o sector primario”, ao tempo que solicitou a colaboración de todos os axentes implicados.
