O sindicato Unións Agrarias (UUAA) presentou unha denuncia ante a Fiscalía da Coruña para solicitar que investigue as importacións de leite procedente de Francia e Portugal, ao considerar que poderían estar a empregarse para abaratar o prezo en orixe en Galicia.
Manobra orquestrada da industria
O responsable do sector lácteo de UUAA, Óscar Pose, explicou que desde o pasado mes de agosto as industrias estarían a realizar “unha manobra orquestrada para baixar o prezo do contrato a partir do 1 de abril”. Segundo indicou, detectouse unha entrada “masiva” de leite foráneo que estaría a provocar unha redución de “uns 7 ou 8 céntimos” no prezo.
Pose detallou que o incremento das importacións situouse entre o 100 % e o 150 % nos últimos meses e sinalou que a denuncia busca que a Fiscalía “investigue” a situación e solicite “documentación” ás industrias implicadas.
Piden inspecciòns
A organización agraria tamén pediu ás administracións que realicen controis para verificar a trazabilidade e o prezo do leite que entra nas plantas galegas. Neste sentido, reclamou á Xunta e ao Goberno central que actúen nas súas competencias de inspección.
Unións Agrarias sostén que este aumento das importacións coincide co proceso de renovación dos contratos lácteos e considera que pode estar a influír nas condicións ofrecidas ás explotacións galegas.
Ademais, o sindicato lembrou que os custos de produción das granxas incrementáronse nas últimas semanas, mentres que as industrias estarían presentando propostas de baixada de prezos, o que, segundo indicou, entra en contradición co establecido pola Lei da Cadea Alimentaria.
