A portavoz nacional do BNG, Ana Pontón, reclamou ao presidente da Xunta, Alfonso Rueda, axudas directas para o sector agrogandeiro galego ante o aumento dos custos de combustibles, fertilizantes e alimentación animal, consecuencia da escalada inflacionista derivada da guerra en Irán.
Pontón instou ao Executivo a apoiar aos produtores e gandeiros e abrir liñas de crédito para as pemes do sector. Ademais, reclamou a aplicación estrita da lei da cadea alimentaria para garantir prezos xustos do leite. “Como pode ser que os nosos gandeiros e gandeiras produzan un leite de primeira, pero lles estean pagando os prezos máis baixos de todo o Estado?”, sinalou durante a súa visita á granxa Pazos en Mazaricos, onde destacou a calidade do produto e a transformación con marca propia.
Pontón advertiu de que a industria anunciou recortes de ata oito céntimos por litro nos próximos contratos, agravando a situación dun sector que produciu o 42 % do leite fresco do Estado en 2025, pero recibiu os prezos máis baixos. A líder nacionalista tamén destacou a necesidade de mobilizar 100.000 hectáreas ata 2030 para ampliar a superficie das explotacións e mellorar a competitividade.
Pontón pediu resolver as axudas de 2025 para a incorporación de xente moza, fronte ao escaso relevo xeracional, dado que só o 3,5 % das explotacións están a cargo de persoas menores de 35 anos. “Estas son medidas que un goberno comprometido co sector estaría tomando”, afirmou.
Finalmente, a portavoz subliñou a situación das infraestruturas en Mazaricos e a rede de camiños rurais deteriorada polos temporais recentes. Pontón anunciou que o BNG levará ao Parlamento galego unha iniciativa para habilitar créditos aos concellos, “básico para que as explotacións gandeiras poidan desenvolver a súa actividade con normalidade”, garantindo que os camiños poidan ser arranxados e as explotacións manter a súa actividade sen interrupcións.
Na súa visita a Mazaricos estivo acompañada polo alcalde Juan Blanco e pola deputada autonómica Ariadna Fernández.
