O local social de San Cosme de Antes, en Mazaricos, acolleu o pasado xoves unha charla informativa organizada polo BNG, na que participaron gandeiros e profesionais do sector agrogandeiro da comarca. O encontro tivo como obxectivo recoller propostas e medidas que poidan facilitar a actividade do sector.
Dermatose Nodular
Durante a xornada abordáronse diversas cuestións, entre elas a ameaza da Dermatose Nodular Contaxiosa, recentemente detectada en Aragón, que suscita preocupación polo seu posible impacto económico nas explotacións galegas. Coincidiuse na importancia da bioseguridade e da vacinación para previr a propagación da enfermidade, que require o baleirado sanitario das ganderías afectadas para deter o seu avance.
Sector Lácteo
A deputada Ariadna Fernández repasou a situación do sector lácteo, destacando a relevancia de Galicia no ámbito estatal e o previsible incremento da produción nos próximos anos. Tamén comentou a prevista redución de prezos por parte das industrias, que afectará aos produtores a partir de marzo.
Xosé Manuel Puga analizou os efectos do tratado de Mercosur sobre o agro galego e os cambios derivados da posible diminución dos fondos da PAC.
Durante o encontro, as persoas participantes expuxeron tamén dificultades relacionadas coas infraestruturas, especialmente estradas e vías de acceso ás explotacións, e intercambiaron propostas e medidas para mellorar as condicións de traballo e o futuro do sector na comarca.
O acto, moderado polo responsable do BNG de Mazaricos, Fernando Rial, contou co presenza do alcalde de Mazaricos, Juan Blanco, do responsable local de Santa Comba, Juan Sixto e do portavoz municipal nacionalista de Negreira, Xosé Ramón Blanco (Pichi), entre outros.
