O presidente da Xunta, Alfonso Rueda, reuniuse co comisario europeo de Agricultura e Alimentación, Christophe Hansen, para trasladarlle a posición do Goberno galego ante o acordo comercial entre a UE e Mercosur e a negociación da nova Política Agraria Común (PAC) no marco financeiro 2028-2034. Segundo indicou, considera que é “unha gran oportunidade” ao estar en fase de decisión.
Acompañado pola conselleira do Medio Rural, María José Gómez, Rueda subliñou o peso do sector primario en Galicia. Lembrou que a comunidade é a principal rexión produtora de leite de España e a novena de Europa, cun 2,1% da produción europea, ademais de xerar o 1,5% da carne de vacún e contar con cinco denominacións de orixe vitivinícolas con exportación internacional.
Estrita observación das cláusulas de salvagarda
En relación co acordo con Mercosur, solicitou que se cumpra o regulamento europeo de salvagardas aprobado en xaneiro e que se reforcen os controis en orixe e nas fronteiras. “Quixemos volver insistir na necesidade dunha estrita observación de todas as cláusulas de salvagarda”, afirmou. Segundo explicou, o comisario comprometeuse a incrementar as inspeccións, lembrando que as aduanas dependen dos Estados membros. Galicia, engadiu, colaborará a través das inspeccións de consumo e saúde pública.
Sobre a futura PAC, Rueda sinalou que o comisario lle trasladou que arredor do 95% dos fondos que recibe España se manterían, mentres o 5% restante continúa en negociación. Destacou a relevancia destas axudas para a modernización e a remuda xeracional e defendeu manter o modelo de xestión descentralizada.
Na reunión tamén se abordou a situación sanitaria ante os focos de dermatose nodular contaxiosa. O presidente pediu maior flexibilidade nas medidas e a implicación da Comisión Europea no desenvolvemento dunha vacina preventiva para reducir o risco nas explotacións de gando vacún.
