Mazaricos acollerá este xoves 5 unha charla informativa sobre a situación actual do sector lácteo e as previsións de baixada dos prezos en orixe. O encontro celebrarase no local social de San Cosme de Antes ás 16.00 horas e contará coa participación de representantes do Bloque Nacionalista Galego (BNG) a nivel local e nacional.
Segundo a organización, están convidados gandeiros e gandeiras das comarcas de Xallas —Santa Comba e Mazaricos— e Barcala —A Baña e Negreira—.
Ariadna Fernández, Xosé Manuel Puga e Fernando Noia
Na xuntanza intervirán o responsable local do BNG, Fernando Noia; o responsable de Medio Rural da formación, Xosé Manuel Puga; e a deputada Ariadna Fernández. O encontro servirá para trasladar a visión do Bloque sobre a actualidade do medio rural e recoller as inquedanzas do sector lácteo nun contexto marcado pola renovación de contratos coas industrias a finais de marzo.
Xosé Manuel Puga sinalou que “malia ser grandes produtores non temos a rendibilidade que merecemos por un produto de máxima garantía sanitaria e calidade”, e apuntou que en Galicia se percibe “o prezo por litro máis baixo do estado”. O responsable nacionalista animou á participación do sector para expoñer necesidades e preocupacións.
Baixadas de prezo
Durante a sesión abordaranse as posibles baixadas do prezo do leite en orixe anunciadas por empresas, así como outras cuestións que afectan ao rural galego. Entre elas figuran as enfermidades emerxentes, como a dermatose nodular contaxiosa, detectada recentemente noutras comunidades, e as súas medidas de prevención.
Tamén se analizarán os efectos do tratado de Mercosur nas producións galegas e a evolución dos fondos da Política Agraria Común (PAC). O encontro ten como obxectivo compartir información co sector e expoñer propostas en relación coa viabilidade das explotacións gandeiras.
