O Concello de Vimianzo presentou esta mañá en FITUR, en Madrid, a súa nova campaña turística baixo o lema “Vimianzo. Comeza a túa conquista”.
A iniciativa inclúe unha peza audiovisual de minuto e medio que pretende situar Vimianzo como campamento base da Costa da Morte, un punto estratéxico desde o que acceder aos principais destinos da comarca, como Fisterra, Camariñas, Laxe ou Malpica.
A campaña destaca a autenticidade, tranquilidade e conectividade do municipio, convidando ás persoas visitantes a conquistar a experiencia da Costa da Morte sen présas e sen masificacións, gozar da paisaxe, a cultura e a gastronomía local.
A alcaldesa, Mónica Rodríguez, subliñou que Vimianzo é un lugar “para chegar, quedar e desde o que comezar a descubrir todo o que pode ofrecernos a Costa da Morte”, reforzando a idea de que este municipio é o corazón lóxico e emocional da comarca.
