O secretario xeral de Unións Agrarias, Roberto García, en relación coa recente votación do Parlamento Europeo sobre o acordo UE–Mercosur, destacou a importancia de solicitar un ditame ao Tribunal de Xustiza da Unión Europea, unha medida que a organización levaba tempo reclamando. Segundo explicou, “nun acordo tan importante como o UE–Mercosur, poñer o proceso baixo control xurídico non só é razoable, é imprescindible”.
O representante sindical subliñou que o acordo ten un alcance significativo, con consecuencias directas para sectores clave como a agricultura e a gandería. Por iso, considera que “aclarar as dúbidas xurídicas antes de seguir adiante non é poñer paus nas rodas, senón actuar con responsabilidade. A seguridade xurídica é unha garantía para todos, non un obstáculo”.
Tras a votación, iniciase agora un período de espera ata que o Tribunal emita o seu ditame, un proceso que poderá levar tempo pero cuxo resultado será vinculante e determinará o camiño a seguir das institucións europeas. “Ese ditame pode ter distintos efectos: desde frear o acordo tal e como está, ata permitir que siga adiante pero con cambios e condicións”, explicou.
Non á aplicación provisional
UUAA advertiu tamén sobre a aplicación provisional do acordo. Segundo detallou, aínda que a ratificación definitiva quede en suspenso, partes do acordo poderían aplicarse de forma práctica sen ditame xurídico se o Consello da UE así o decide. Isto xera, segundo a organización, un risco evidente de inseguridade para os sectores máis expostos.
Neste contexto, UUAA apelou ao Parlamento Europeo para que adopte medidas que impidan a aplicación provisional ata que exista unha base xurídica clara. A organización reafirmou que seguirá en contacto cos sectores máis afectados durante este período, co obxectivo de garantir que, se o acordo avanza cara á ratificación, se faga “con garantías reais, con regras claras e con mecanismos de control efectivos. Porque non se pode aplicar un acordo destas dimensións sen seguridade xurídica para o sector agrario. E iso require traballo, non consignas simples”.
