A Deputación da Coruña mantén o seu apoio ao sector lácteo a través do plan de mellora xenética do gando frisón que impulsa AFRICOR. A deputada de Mar e Medio Rural, Cristina Capelán, reuniuse en Santiago coa directiva da Asociación Provincial de Criadores de Gando Frisón da Coruña (AFRICOR), encabezada polo seu presidente, Fernando Suárez Mouro, para avaliar o impacto das axudas provinciais a este proxecto.
A Deputación colabora con AFRICOR desde hai anos na realización de probas xenómicas co obxectivo de mellorar a calidade xenética do gando vacún frisón, incrementar a competitividade das explotacións e avanzar cara a un modelo máis eficiente e sostible.
Desde a entidade destacaron que esta colaboración permitiu facilitar o acceso ao xenotipado das becerras, reducindo custos e favorecendo a incorporación de máis gandeiros ao programa de recría xenómica de CONAFE.
Desde 2018 rexistrouse un aumento notable do número de animais xenotipados, o que se traduce nunha mellor selección reprodutora, na prevención de enfermidades xenéticas e nunha maior rendibilidade das explotacións.
AFRICOR propuxo estender o xenotipado ao cen por cen das trinta mil becerras frisóns da provincia. Cristina Capelán subliñou que a mellora xenética é clave para garantir o futuro do sector lácteo coruñés.
