O acordo comercial entre a Unión Europea e os países do Mercosur segue xerando debate no sector agrario. Unións Agrarias aposta por unha análise baseada nos datos coñecidos e no impacto real por sectores, segundo explicou en Radio Xallas, Óscar Pose, dirixente do sindicato.
O acordo entre a Unión Europea e os países do Mercosur xerou preocupación en parte do sector agrario, aínda que Unións Agrarias non mantén unha oposición frontal ao tratado. Así o afirmou Óscar Pose, dirixente do sindicato, quen lembrou que se trata dun proceso “que vén de moi atrás” e que nos últimos anos se acelerou.
Un enfoque sen oposición frontal ao acordo
Pose sinalou que a organización reclama condicións que permitan a convivencia cos produtores europeos. “O importante é que se poida convivir e que non afecte aos nosos produtos”, afirmou.
Segundo explicou, o sector lácteo galego non sería dos máis afectados polo tratado. “Non existe un excedente lácteo no Mercosur; incluso pode haber oportunidades para determinados produtos, como os queixos”, indicou. Pola contra, recoñeceu maior incerteza noutros ámbitos, especialmente no sector cárnico.
Importacións limitadas e cláusulas de salvagarda
Neste sentido, destacou que as importacións estarán reguladas. “As cantidades están tasadas; non pode entrar toda a carne que queira Mercosur”, precisou, indicando que no caso do vacún o máximo sería arredor do “1,5 % da produción anual da Unión Europea”.
Unións Agrarias considera clave a aplicación das cláusulas de salvagarda para evitar distorsións no mercado. Pose subliñou que estas medidas permitirían frear as importacións “cando haxa unha baixada do 5 % nos prezos”, co obxectivo de protexer aos produtores europeos.
«Non é certo que vaia a entrar alimento sen control»
O dirixente sindical fixo fincapé na necesidade de manter os controis en fronteira. “Non vale calquera produto; ten que cumprirse a normativa europea”, asegurou, lembrando que os estándares sanitarios da UE non se verían modificados polo acordo. “Non é certo que vaia entrar alimento sen control”, engadiu.
Sobre a decisión do sindicato de non convocar mobilizacións, Pose explicou que responde á posición dos seus afiliados tras analizar a situación con informes técnicos. “Non nos acollemos á demagoxia; tomamos decisións cos datos enriba da mesa”, afirmou.
Para Unións Agrarias, o acordo é xa unha realidade e o traballo debe centrarse na súa aplicación. “Isto está aí, si ou si, e toca ser realistas”, concluíu Pose.
