O agro galego mobilizouse hoxe en A Coruña contra o acordo de libre comercio entre a Unión Europea e os países do Mercosur. Convocados polo Sindicato Labrego Galego e pola Asociación de Gandeiros Elas Eles, máis de cen persoas concentráronse diante da Delegación do Goberno para denunciar unha competencia desleal que ameaza a supervivencia de granxas e explotacións.
“España, Europa e Galicia non se poden permitir perder nin un só agricultor, ningún gandeiro máis”, destacou unha gandeira participante. Ao longo da concentración coreáronse lemas como “A vosa firma, a nosa ruína” ou “Mercosur, fame para o norte e fame para o sur”.
María Ferreiro, secretaria xeral do SLG, subliñou que a entrada masiva de produtos provocaría unha caída dos prezos que reciben as persoas agricultoras e gandeiras, mentres Adrián Riádigos, presidente de Gandeiros Elas Eles, advertiu que “é unha competencia desleal que vai producir peche de explotacións” e que o consumidor tamén está a ser enganado con produtos hormonados e prohibidos en Europa.
O SLG anunciou que trasladará este rexeitamento a Bruxelas e organizará accións de difusión para informar á cidadanía sobre o impacto do acordo na saúde, no medio ambiente e na soberanía alimentaria. Entre os máis afectados están a gandería, os cítricos, a pataca e o mel, mentres que sectores como o aceite ou o viño poderían atopar novas oportunidades.
A concentración contou co apoio de organizacións ambientais e culturais como Amigas da Terra, Greenpeace, Ecoloxistas en Acción, Ecoloxistas Galiza Atlántica, Verde e Tarabelada, integradas no movemento Plantámonos.
