Centos de agricultores e gandeiros manifestáronse este luns en Lugo para rexeitar a sinatura do acordo comercial entre a Unión Europea e os países do Mercosur.
A protesta, convocada por Agromuralla, Gandeiros Galegos da Suprema e outras organizacións do sector, contou coa participación duns cincuenta tractores e percorreu o centro da cidade desde a sede da Xunta de Galicia ata a Subdelegación do Goberno.
Os convocantes advirten de que a entrada en vigor deste tratado poría en risco a viabilidade das explotacións galegas e a seguridade alimentaria da poboación, ao permitir a importación de produtos con estándares de calidade, sanitarios e ambientais inferiores aos esixidos na Unión Europea.
Durante a mobilización, os produtores leron manifestos dirixidos ás administracións autonómica e estatal nos que alertan de consecuencias como a destrución de explotacións familiares, a perda de emprego no rural, o aumento da dependencia alimentaria exterior e a competencia desleal para o sector agrogandeiro.
As organizacións participantes reclaman un “veto político” á sinatura do acordo, prevista para finais desta semana, mentres non se garantan condicións de reciprocidade que obriguen aos produtos importados a cumprir os mesmos requisitos que se esixen ás explotacións europeas.
A mobilización de Lugo coincidiu con protestas semellantes noutros puntos de Galicia e do Estado. Ao remate do percorrido, os manifestantes instalaron un punto informativo para explicar aos consumidores os posibles efectos do acordo na saúde e na seguridade alimentaria.
«O sector agrogandeiro leva anos soportando unha presión crecente: incremento de custos, esixencias legais cada vez máis complexas, redución de marxes e incerteza estrutural. A pesar diso, continúa garantindo alimentos de calidade, seguros, trazables e producidos baixo os estándares máis altos de calidade da UE» aseguran desde as entidades Agromuralla e Gandeiros Galegos da Suprema.
