Sindicato Labrego Galego e Elas Elas en A Coruña e Agromuralla e Gandeiros Galegos da Suprema en Lugo. Foto de arquivo
O acordo de libre comercio UE-Mercosur foi aprobado este venres pola Unión Europea, cunha maioría cualificada de países a favor e a oposición de Hungría e Francia. Desde Europa aseguran que no acordo “hai salvagardas” para a agricultura.
Pero en Galicia hai un malestar evidente e novas mobilizacións convocadas.
Agromuralla e Gandeiros Galegos de Suprema
As organizacións Agromuralla e Gandeiros Galegos da Suprema convocan unha manifestación en Lugo o vindeiro luns, 12 de xaneiro, para rexeitar o acordo comercial entre a Unión Europea e os países do Mercosur. A protesta comezará ás 12 da mañá diante do edificio da Xunta de Galicia, na Ronda da Muralla, e finalizará diante da Subdelegación do Goberno.
Segundo os convocantes, a entrada en vigor do tratado poría en risco as explotacións de vacún de leite e carne galegas, ao permitir a importación de produtos con estándares de calidade inferiores aos nacionais. Noelia Rodríguez, presidenta de Agromuralla, asegura que “vaise abrir a porta á entrada de carne e outros produtos sen as mesmas garantías que os que producimos aquí”.
Sindicato Labrego Galego e Elas Eles
O Sindicato Labrego Galego convoca unha concentración o vindeiro luns, 12 de xaneiro, ás 12 do mediodía diante da Delegación do Goberno na Praza de Ourense, xunto ao porto, para esixir a paralización da firma do tratado entre a Unión Europea e os países do Mercosur.
O SLG alerta de que este acordo compromete a soberanía alimentaria e a viabilidade económica das granxas galegas, ao permitir a entrada de grandes cantidades de produtos como carne de vacún ou mel con aranceis reducidos ou nulos. Segundo o sindicato, a sociedade rexeita mayoritariamente este tratado, que favorece os intereses comerciais por riba da protección do sector primario.
Os participantes reclamaran un comercio xusto e seguridade para as explotacións locais, facendo fincapé en que a firma do acordo non poida comprometer a sustentabilidade das granxas galegas.
A esta convocatoria únese a asociación de gandeiras e gandeiros Elas Eles. En declaracións a Radio Xallas, seu presidente, Adrián Riádigos, non ocultou a súa preocupación por este acordo e pola “opacidade” con respcto aos termos do mesmo.
Riádigos alertou de que o acordo suporía unha competencia desleal para Galicia, ao permitir a entrada de produtos elaborados baixo estándares sanitarios e ambientais distintos aos europeos. «Estamos vendo que produtos que aquí xa se prohibiron van volver entrar pola porta de atrás».
