A primeira xornada da tempada de pesca fluvial veu acompañada polo frío e tamén polo vento do norte.
Desde Sigueiro(Oroso) a conselleira de Medio Ambiente, Ángeles Vázquez, destacaba o aumento de licenzas: “Estamos nunhas 48.500 licenzas de pesca, que veñen a ser unhas 8.800 máis ca o ano anterior. É bo que a xente se anime e haxa remuda xeracional, e o que pretendemos e facilitárllo».
Pola súa banda, nas augas do Xallas, a xornada estivo afectada polo frío matinal como informou Jorge García: “Foi un día regular de capturas con moitísimo frío pola mañá, con augas transparentes e frías e nula actividade por parte das troitas”.
Non moitas capturas pero de bo tamaño e mellor pesca para “os de cucharilla, despois miñoca e peor os de mosca” explicaba o directivo da sociedade de pesca de Santa Comba.
Jorge García aseguraba que “os pescadores, como sempre, acudiron a estrear a nova tempada con máis ilusión que resultados debido a frialdade do día e o vento do norte”. Aínda que engadía un dato positivo: “Os ríos baixan espectaculares de auga e a tempada é prometedora”.
Desde o río Grande, en Baio, coincidían na cuestión climatolóxica, ainda que varios pescadores consultados confesaban comezar a tempada con captures aceptables.
