O Presidente da Asociación Agraria de Galicia(ASAGA) denunciou a “hipocrisía tremenda do PSOE” con respecto á Lei de Restauración da Natureza, aprobada na Unión Europea, que “é unha lei nefasta para os intereses de Galicia e un varapau para miles de explotacións”.
Lembrou que o ponente da lei é o eurodeputado socialista César Luena e que “a Ministra de Transición Ecolóxica non foi permeable a cuestión que vimos demandando”.
Paco Bello agarda que despois das eleccións europeas “poidan modificarse cuestións” se ben está convencido de que “esta será outra das leis que suscitará rexeitamento e probables mobilizacións no seu momento”.
Animadversión de Teresa Ribera
Nunha entrevista no programa Na Encrucillada de Radio Xallas, o dirixente de ASAGA, asegurou que a vicepresidenta terceira e Ministra para a Transición Ecolóxica, Teresa Ribera, “ten animadversion total cara a actividade agrícola e gandeira do país” coa idea de que “pechemos as granxas porque a ela o que lle interesa é o mercadeo das emisións de carbono”.
Para Paco Bello semella que o obxectivo é “trasladar esas emisións de carbono a outros sectores que interesa máis coidar”.
Na entrevista tamén se referiu as negociacións que se están levando a cabo con respecto a PAC e a outros temas que preocupan o sector.
