O conselleiro de Medio Rural, José González, participou nunha xuntanza con gandeiros na Casa da Cultura da Picota, no concello de Mazaricos e reiterou a súa petición ao executivo que preside Pedro Sánchez para que se reúna canto antes coa plataforma que convocou o paro para desbloquear esta situación, que pode facer que colapse a cadea agroalimentaria galega.
Habilitar corredores seguros e cumprimento da Lei da Cadea Alimentaria
Tamén esixe que se cumpra a Lei da Cadea Alimentaria e exixe que se faga efectiva a prohibición de venda a perdas. González instou ao Ministerio de Agricultura s que se reúna inmediatamente coa distribución, coa industria e coa gandaría para, canto antes, acordar unha suba do prezo dos produtos que están percibindo os nosos gandeiros.
Desde a Xunta piden que se habiliten “corredores seguros” que permitan a chegada de materias primas ás industrias de pensos, a chegada dos pensos ás explotacións gandeiras e a saída do leite das granxas, a saída de produtos lácteos das industrias e dos produtos cárnicos dos matadoiros.
José González lembrou o paquete de medidas aprobado polo goberno galego como o compromiso de financiar o anticipo das axudas directas da PAC, que as explotacións cobran no mes de outubro de cada ano. Así, trasladou o conselleiro, o Goberno galego anticipará seis meses uns 200 millóns de euros de liquidez para os agricultores e gandeiros, subvencionando os xuros.
Doutra banda, contémplase a apertura de liñas de crédito de ata 20.000 euros para poder atender compras de circulante, por parte dos gandeiros, avaladas pola Xunta. Para esta operación, a Consellería do Medio Rural dispón dunha liña de avais para chegar ata os 25 millóns de euros de préstamos.
Peticións do alcalde de Mazaricos
Pola súa banda o alcalde de Mazaricos, Juan Blanco, informou dos contactos que mantivo nas últimas datas:“Buscamos durante todo este tempo solucións que permitan manter a recollida do leite, pero non se nos ofreceu ningunha viable”
Blanco Riveiro anunciou que Mazaricos unirase a outros 24 concellos produtores de leite en Galicia para asinar unha carta que reclama ao Ministerio de Transporte “que sente a negociar co sector do transporte e desbloquee unha situación da que os nosos gandeiros son reféns”, sinalou.
O alcalde e o conselleiro atenderon ás dúbidas das persoas asistentes, trasladando a disposición da Xunta e do Concello para trasladar as súas demandas e esixir diálogo de cara a unha solución negociada do conflito do transporte. Juan Blanco lembrou que en Mazaricos xa se desperdiciaron máis de 100.000 litros de leite a semana pasada e que “cada hora que pasa sen solución estase agravando a situación, con implicacións en todos os ámbitos”.